Претставници на Организацијата на жени од Струмица остварија средба со градоначалникот на Општина Струмица, Костадин Костадинов, на која се разговараше за потребата од воспоставување јасен, транспарентен и правичен систем за финансиска поддршка на граѓанските организации од општинскиот буџет.
На средбата беа презентирани трите предлог-методологии и придружната техничка документација, развиени преку партиципативен процес со активно учество на сите засегнати страни – членови на неформалната работна група составена од претставници на ГО, културни работници, советници/чки и претставници на општината.
Во фокусот на разговорот беше потребата од поддршка за иницијативата која се залага за фер, правична и транспарентна распределба на буџетските средства за граѓански иницијативи и проекти.
Активноста се реализираше во рамки на проектот „Активни за транспарентно и одржливо финансирање на граѓански организации (ГО)”, преку кој Организацијата на жени од Струмица работи на унапредување на постојните практики за распределба на јавните средства, со цел воспоставување транспарентен, правичен и отчетен модел за поддршка на ГО на локално ниво.
Проектот е поддржан со ад-хок грант на регионалниот проект „СМАРТ Балкан - Граѓанско општество за поврзан Западен Балкан“ имплементиран од Centar za promociju civilnog drustva (CPCD) од Босна и Херцеговина, Центар за истражување и креирање политики (ЦИКП) од С. Македонија и Институт за демократија и медијација (ИДМ) од Албанија, финансиски поддржан од Министерството за надворешни работи на Кралството Норвешка.